Rebecca Eriksson gengur til liðs við HV sem rannsakandi
Rebecca Eriksson, meistaranemi á öðru ári í Sjávarbyggðafræði gengur til liðs við Háskólasetur Vestfjarða (HV) sem rannsakandi á komandi ári. HV leggur mikla áherslu á að nemendur taki virkan þátt í rannsóknarverkefnum, og á undanförnum árum hefur sífellt fleiri meistaranemum gefist tækifæri til að taka þátt í bæði innlendum og alþjóðlegum rannsóknum.
Rebecca er ein þeirra. Hún skrifaði meistararitgerð sína í tengslum við alþjóðlegt rannsóknarverkefni sem ber heitið Local Knowledge in Marine Spatial Planning, Green Transition, and Digital Transformation, sem stýrt er af Nordregio í samstarfi við University of the Highlands and Islands og HV. Verkefnið snýst um að kanna hvernig staðbundin þekking nýtist í skipulagningu haf- og strandsvæða, sérstaklega í ljósi vaxandi stafrænnar þróunar og þeirrar umbreytingar sem fylgir grænni framtíðarsýn.
Í ritgerðinni sinni skoðaði Rebecca hvernig tæknilausnir og gervigreind (AI) hafa áhrif á það hvernig staðbundin þekking og þekking frumbyggja er nýtt í skipulagi á Norðurlöndum. Niðurstöður hennar varpa ljósi á bæði tækifæri og áskoranir sem felast í þessari gagnadrifnu nálgun: Tæknilausnir geta stutt við aukna þátttöku en geta jafnframt viðhaldið núverandi valdaójafnvægi með því að ýta til hliðar þekkingu sem ekki fellur auðveldlega að stöðluðum gögnum og aðferðum. Í rannsókninni beitti Rebecca kerfisbundinni yfirferð, tók viðtöl við sérfræðinga og skipulagði þverfaglega vinnustofu með hagaðilum víðs vegar af Norðurlöndum.
Rebecca hefur þegar tekið virkan þátt í verkefninu sem rannsóknaraðstoðarmaður síðastliðið ár. Hún leiddi meðal annars þverfaglega vinnustofu um staðbundna þekkingu og stafræna þróun á alþjóðlegri ráðstefnu í Skotlandi. Nú þegar stutt er í meistaravörnina hennar í vor mun Rebecca taka næsta skref og ganga til liðs við teymi HV sem rannsakandi. Hún mun áfram vinna með Matthias Kokorsch og samstarfsfólki frá Nordregio og University of the Highlands and Islands.
Við viljum bjóða Rebeccu hjartanlega velkomna, við erum afar ánægð að fá hana inn í hópinn okkar og vonum að í framtíðinni verði til enn fleiri tækifæri og styrkir sem gera meistaranemum kleift að halda áfram rannsóknum sínum hér við HV.