Fréttir

Háskólasetur Vestfjarða (HV) tekur þátt í samstarfsverkefninu „Máltæknikjarni“, sem unnið er í samstarfi við Háskóla Íslands. Markmið verkefnisins er að þróa nýjar og skilvirkar leiðir til tungumálanáms, sem eru hagkvæmar og aðgengilegar óháð búsetu. Hluti af þessu verkefni tengist sérstaklega Vestfjörðum og starfsemi HV.

Það er gaman að segja frá því að Háskólasetur Vestfjarða (HV), Strandabyggð og Fine Foods Íslandica ehf á Hólmavík hafa hlotið styrk frá Evrópusambandinu sem nemur 70 þúsund evrum eða rúmum 10.3 milljónir krónum til að styðja við framkvæmd IceKelp verkefnisins á tímabilinu 2024-2026. Markmiðið er að hanna líkan fyrir sjálfbæra þararækt og blátt hagkerfi í dreifbýli. Greint er frá þessu á vef Strandabyggðar.

Aðalfundur Stúdentagarða Háskólaseturs Vestfjarða hses. vegna ársins 2024 verður haldinn föstudaginn 16. maí 2025 kl. 13:00 í húsnæði Háskólaseturs Vestfjarða.

Á Háskólahátíð fögnum við með þeim nemendum sem útskrifast úr meistarnámi hjá Háskólasetri, sem og fjarnemum af Vestfjörðum. Skólaárið 2024/2025 hafa 28 meistaranemendur skilað lokaverkefnum í sjávarbyggðafræði og haf- og strandsvæðastjórnun. Báðar námsleiðir eru kenndar hjá Háskólasetri Vestfjarða í samvinnu við Háskólann á Akureyri. Formleg útskrift er frá HA, en Háskólasetrið efnir til Háskólahátíðar á Hrafnseyri þann 17. júni 2025, líkt og fyrri ár, þar sem útskriftarnemendur fá afhent prófskírteinin. Háskólasetur Vestfjarða býður einnig velkomna alla vestfirska útskriftarnema til að samfagna á Háskólahátíðinni á Hrafnseyri.

Páskarnir eru á næsta leiti og eins og venja er tekur Háskólasetrið sér smá páskafrí. Húsið verður lokað föstudaginn langa, 18. apríl, og laugardaginn 19. apríl. Inngangurinn frá Suðurgötu verður þá læstur og lyklaspjöld ekki virk — jafnvel duglegustu nemendur og starfsmenn þurfa að taka sér smá pásu. Ef upp kemur neyðartilvik má hafa samband í síma 844 3148.

Nú er aftur komið að meistaraprófsvörnum hjá nemendum Háskólaseturs Vestfjarða. Varnirnar hefjast á þriðjudaginn 22. apríl og munu 16 nemendur kynna og verja meistaraverkefni sín á næstu vikum. Að venju eru umfjöllunarefnin afar áhugaverð og fjölbreytt. Varnirnar eru opnar almenningi og fara fram í Háskólasetri. Einnig er hægt að fylgjast með á zoom og má finna linkana í töflunni hér að neðan.

Rebecca Eriksson, meistaranemi á öðru ári í Sjávarbyggðafræði gengur til liðs við Háskólasetur Vestfjarða (HV) sem rannsakandi á komandi ári. HV leggur mikla áherslu á að nemendur taki virkan þátt í rannsóknarverkefnum, og á undanförnum árum hefur sífellt fleiri meistaranemum gefist tækifæri til að taka þátt í bæði innlendum og alþjóðlegum rannsóknum.

Tómas Jóhannsson sérfræðingur í ofanflóðahættumati hjá Veðurstofu Íslands kom á dögunum vestur til Snjóflóðaseturs, og hafði meðferðis fullhlaðið skott af tímaritum fyrir bókasafn HV. Tómas er í ritstjórn Jökuls, tímarits um jöklarannsóknir, en hefur árum saman verið áskrifandi af tímaritunum Journal of Glaciology og Annals of Glaciology, sem honum fannst nú vera best komið fyrir þar sem almenningur hefði aðgang að, og munu þau nú koma bæði námsmönnum hjá Háskólasetri sem og starfsmönnum í húsinu til góða.

Háskólasetur Vestfjarða (HV) hefur hlotið styrk frá NordForsk fyrir „ARCHAIC“ verkefnið (Sustainable and Resilient Communities in Remote Settlements in the Arctic in the Age of Climate Change). Meginmarkmið verkefnisins er að skapa nýja þekkingu um aðlögun að loftslagsbreytingum og viðbrögð við náttúruvá í afskekktum samfélögum á Norðurslóðum, með áherslu á sjálfbærni og seiglu.

Háskólasetur Vestfjarða (HV) fékk afar veglega gjöf á opnu húsi sem haldið var nýlega í Vestrahúsi. Um er að ræða 86” skjá sem heitir Maxhub XBoard MTR og sameinar fundarskjá, Teams Rooms fjarfundabúnað, tússtöflu og þráðlausan tengibúnað í eitt og sama tækið. Gjöfin er frá þeim Þorsteini Jóhannessyni og konu hans Margréti Hreinsdóttur. Þorsteinn Jóhannesson er Ísfirðingum kunnugur sem f.v. yfirlæknir á Fjórðungssjúkrahúsi í nær 30 ár. Þorsteinn hefur líka verið virkur í sveitarstjórnarmálum og ekki síst hefur hann beitt sér fyrir stofnun HV og er fyrirtæki Þorsteins, Skurðlæknirinn ehf., einn af stofnaðilum þess.